युक्रेनी पाइलटलाई तालिम दिन नर्वेले डेनमार्कमा दुई लडाकु जेट पठाउने

हाम्रा कुरा

प्रकाशित २०८० पुष १९ बिहिबार

काठमाडौँ । युक्रेनका पाइलटहरूलाई विमान प्रयोगमा प्रशिक्षित गर्न सहयोग पुर्याउन डेनमार्कमा दुई एफ-१६ लडाकू जेट पठाउने नर्वे सरकारले बुधबार बताएको छ ।

गत वर्ष नर्वेले डेनमार्क र नेदरल्यान्ड्स जस्ता मुलुकसँग मिलेर युक्रेनलाई एफ-१६ लडाकू जेट दान दिएका थिए । अत्याधुनिक एफ-३५ ले प्रतिस्थापन गर्नका लागि ती मुलुकले एफ-१६ लाई अवकास दिएका थिए ।

यद्यपि ओस्लोले अहिलेसम्म दान दिइने एफ-१६ को सङ्ख्या र डेलिभरीको तालिका घोषणा गरेको छैन । युक्रेनलाई दिइने एफ-१६ विमान सीमित सङ्ख्यामा हुने अपेक्षा गरिएको छ ।

नर्वेका रक्षामन्त्री ब्योर्न एरिल्ड ग्रामले एक विज्ञप्तिमा भने, “युक्रेनका लागि दिगो र आधुनिक वायु सेना स्थापना गर्ने लक्ष्यका लागि सहयोगी साझेदार र राज्यहरूले दिनरात काम गर्नेछन् ।”

स्क्यान्डिनेभियाली मुलुक नर्वेले यसअघि नै करिब १० प्रशिक्षकका साथ प्रशिक्षण कर्मचारी आपूर्ति गरिरहेको छ ।

नर्वेली एफ-१६ लडाकू जेटलाई अझै अनिश्चित अवधिका लागि डेनिस स्क्रिडस्ट्रप्स विमानस्थलमा तैनाथ गरिनेछ । त्यहाँ युक्रेनी पाइलटहरूलाई बहुराष्ट्रिय अपरेसनको हिस्साका रूपमा प्रशिक्षित गरिनेछ ।

नयाँ वर्षको सम्बोधनमा युक्रेनका राष्ट्रपति भोलोदिमिर जेलेन्स्कीले भने, “देशका पाइलटहरू पहिलादेखि नै एफ-१६ जेटमा निपुण छन् र हामी निश्चितरूपमा तिनीहरूलाई हाम्रो आकासमा देख्नेछौँ ।”

उनले रुसी सेनाले सन् २०२४ मा युक्रेनको ‘क्रोध’ महसुस गर्ने वाचा गरे ।