इजरेली नौसेनाद्वारा गोलाबारी, गाजा आक्रमणमा २० हजार ६ सयको मृत्यु
हाम्रा कुरा
प्रकाशित २०८० पुष १० मंगलबार
747
Shares
काठमाडौँ । इजरेली नौसेनाले गाजा पट्टीमा हमासका आतङ्ककारी टोलीहरूलाई आक्रमण गरेको दाबी गरेको छ ।
इजरेली रक्षा बलले सोमबार बिहान बताए अनुसार आइडीएफले नौसेनाले हमासका कार्यकर्ताहरू लुकेका थुप्रै भवनहरूमा आक्रमण गरेको छ। साथै नौसेनाले हमासको टोलीले इजरेली सैनिकहरूमाथि मोर्टार र गोली हानेका स्थानहरूमा पनि आक्रमण गरेको दाबी गरेको छ ।
यसैबीच, वायुसेनाले खान युनिस क्षेत्रमा गरेको हवाई हमलामा हमासका एक जना कमान्डर मारिएका छन् । छुट्टै हवाई हमलामा रकेट बोकेका अन्य थुप्रै आतङ्ककारी मारिएको बताइएको छ ।
गत अक्टोबर ७ मा गाजा सीमा नजिक इजरेली समुदाय लक्ष्यित हमासको आक्रमणमा कम्तिमा १ हजार २०० जनाको मृत्यु भएको थियो।
यता गाजामा इजरेलले गरेको आक्रमणम मृत्यु हुनेको सङ्ख्या २० हजार ६ सय ७४ पुगेको छ ।
हमासद्वारा सञ्चालित गाजामा रहेको स्वास्थ्य मन्त्रालयले सोमबार अक्टोबरको शुरुदेखि इजरेलसँगको युद्धमा प्यालेस्टाइन क्षेत्रमा कम्तिमा २० हजार ६७४ व्यक्तिको मृत्यु भएको जनाएको छ।
अक्टोबर ७ मा दक्षिणी इजरेलमा हमासले गरेको घातक हमलाबाट शुरु भएको युद्धमा अहिलेसम्म ५४ हजार ५३६ व्यक्ति घाइते भएको पनि मन्त्रालयले जनाएको छ।
गाजामा हमासले बन्दी बनाएका पुरुष, महिला, बालबालिका, सैनिक र विदेशीहरूको सङ्ख्या अहिले १२९ रहेको विश्वास गरिएको छ ।
