रौतहट । शिक्षा नियमावली र कानून विपरीत एक बहालवाला शिक्षकले एमाले मधेस प्रदेश अधिवेशनमा मधेस प्रदेश सदस्य पदको लागि मनोनयन दर्ता गरेका छन् ।
रौतहटको राजपुर नगरपालिका सरस्वती सदन आधारभूत विद्यालयमा कार्यरत शिक्षक मणिशंकर निधी (प्रावि द्वितीय) ले जनकपुरधाममा जारी मधेस प्रदेश अधिवेशनमा मधेस प्रदेश सदस्य खुल्ला तर्फबाट आफ्नो उम्मेदवारी मनोनयन दर्ता गरेका हुन् ।
प्रस्तावक रुपेश पटेल र समर्थक सन्तोषकुमार साहको समर्थनमा एमएस निधीको नामले आफ्नो उमेदवारी दर्ता गरेका शिक्षक मणिशंकर निधीले नेकपा एमालेबाट बिसं २०४७ सालमा पार्टी सदस्यता लिएका थिए ।
सदस्यता नं १०४९८ नम्बरको पार्टी सदस्य कायम रहेका बहालवाला शिक्षक निधी यसअघि नेकपा एमालेको मधेस प्रदेश कमिटीको सचिवालय सदस्यसमेत रहेका थिए ।
राजनीतिक दल सम्बन्धी ऐन, २०७३ को दफा १४ को उपदफा (२) अनुसार सङ्घीय, प्रदेश र स्थानीय सरकारको स्वामित्व वा नियन्त्रणमा रहेको स्वशासित संस्थाको बहालवाला प्राध्यापक, शिक्षक र कर्मचारीको पदमा बहाल रहेको व्यक्ति राजनीतिक दलको सदस्य हुन नसक्ने व्यवस्था हुँदाहुँदै पनि निज शिक्षक देशको कानून विपरीत राजनीतिक दलको सदस्यता नत्यागी लामो समयदेखि राजनिमा सक्रिय हुँदै आएका छन्।
