डडेल्धुरा । डडेल्धुरा जिल्लाको भित्रिमधेस क्षेत्र परशुराम नगरपालिका-८ गुप्तीगडा गाउँमा झन्डै एक हप्तादेखि फैलिएको झाडापखालाबाट एक सय ६० जना स्थानीय थलिएका छन् । उनीहरूको स्थानीय विद्यालयमा उपचार केन्द्र स्थापना गरेर उपचार गरिन थालिएको छ । 

झाडापखालाकै कारण एक किशोरीको मृत्यु भएको गुप्तीगडा गाउँमा हाल स्वास्थ्यकर्मीहरूको टोलीले गाउँमै उपचार सेवा प्रदान गरिरहेको परशुराम नगरपालिकाको स्वास्थ्य शाखाका प्रमुख तेजबहादुर सिंहले जानकारी दिए । गत साता झाडापखालाले सिकिस्त बिरामी भएकी १४ वर्षीया सङ्गीता धामीको जोगबुडा अस्पतालले धनगढी रेफर गरेपछि बाटोमा मृत्यु भएको थियो ।

गत साताको मंगलबार बिहान जोगबुडा अस्पताल भर्ना गरिएकी किशोरी धामीलाई साँझ रिफर गरिएको र रिफर गरिएको केही समयमा मृत्यु भएको हो । केही दिनअघि बिरामी परेकी धामीको झाडापखालाका कारण मृत्यु भएको जोगबुडा अस्पतालका डाक्टर जितेन्द्र चौधरीले बताए । मृतक किशोरीको शरीरमा पानीको मात्रा निकै कम भएको अवस्थामा थप उपचारका लागि धनगढी रेफर गरेकामा बाटोमै मृत्यु भएपछि परिवारजन तथा आफन्तहरूले अस्पतालको लापरबाहीका कारण मृत्यु भएको भन्दै आन्दोलन गरेका थिए । 

परशुराम नगरपालिकाले मृतकको परिवारलाई क्षतिपूर्ति दिने र लापरबाही गर्ने स्वास्थ्यकर्मीलाई सरुवा गर्ने निर्णय गरेपछि चार दिनपछि मात्रै शव बुझेर दाहसंस्कार गरिएको थियो । हाल गुप्तीगडा गाउँमा एक सय ६० जना झाडापखाला संक्रमित स्थानीयको सामूहिक उपचार भइरहेको छ । स्वास्थ्य निर्देशनालय दिपायलले १० महिनादेखि ९० वर्ष उमेरसम्मका बासिन्दा झाडापखालाबाट प्रभावित भएको जनाएको छ । सरुवा रोग नियन्त्रण फोकल पर्सन हरिप्रसाद भट्टको नेतृत्वमा स्वास्थ्यकर्मीहरूको टोली गाउँमा पुगेर उपचार सेवासँगै जनचेतनामूलक कार्यक्रमहरु सञ्चालन गरिरहेको स्वास्थ्य कार्यालय डडेल्धुराले जनाएको छ । 

जोगबुडा अस्पतालका सूचना अधिकारी प्रकाश घिमिरेले गुप्तीगडा गाउँका झाडापखालाबाट पीडित आठ जना बिरामी उपचारका लागि अस्पताल भर्ना भएको जानकारी दिए । ‘झाडापखाला देखिएपछि यसको रोकथामका लागि पानी शुद्धीकरण गरेर उपभोग गर्ने व्यवस्था गर्न लागिएको छ, प्रभावित अन्य बिरामीको गाउँमै खटिएको स्वास्थ्य टोलीले उपचार गरिरहेको छ ।’ उनले भने ।

खानेपानीको मुहान प्रदूषित भएका कारण सो गाउँमा झाडापखालाको समस्या देखिएको हो । खानेपानी शुद्धीकरण गरेर प्रभावित बिरामीहरूको उपचार कार्य भइरहेको परशुराम नगरपालिकाका स्वास्थ्य शाखा प्रमुख सिंहले बताए । उनले सोमबारदेखि झडापाखलाका नयाँ बिरामी नदेखिएकाले गुप्तीगडा गाउँमा झाडापखाला नियन्त्रणतर्फ उन्मुख भएको दाबी गरे । 

झाडापखाला प्रभावित बिरामीहरूको स्वास्थ्य अवस्थामा सुधार आइरहेको उपचारमा संलग्न साँदनी स्वास्थ्य चौकीका इन्चार्ज जयबहादुर धामीले बताए । नयाँ केस नदेखिएकाले झाडापखालाको प्रकोप नियन्त्रण हुन थालेको उनले बताए । नयाँ केस देखिएको अन्तिम समयदेखि पाँदिनसम्म उपचार शिविर राख्ने प्रावधानअनुसार हाल स्थानीय विद्यालयमा स्थापना गरिएको उपचार शिविरमा स्थानीयको उपचार भइरहेको परशुराम नगरपालिकाले जनाएको छ । २०७५ सालमा पनि सो गाउँमा झाडापखालाको प्रकोप देखिएको थियो ।