बारामा उपेन्द्र अगाडि, शिवचन्द्र र पुरुषोत्तमबीच प्रतिस्पर्धा, रमेश निकै पछि
प्रिमेश शिवाकोटी,
प्रकाशित २०८० वैशाख ११ सोमबार
537
Shares
बारा । प्रतिनिधि सभा निर्वाचन अन्तर्गतको उपनिर्वाचनमा बारा २ मा मतगणना शुरु भएको छ । शुरुआती परिणामअनुसार जसपाका अध्यक्ष उपेन्द्र यादव अगाडि रहेका छन् । ६०७ मत गनिसक्दा उनले २२४ मत प्राप्त गरेका छन् ।
दोस्रो स्थानमा जनमत पार्टीका शिवचन्द्रप्रसाद कुशवाहा रहेका छन् । उनले १७० मत प्राप्त गरेका छन् । एमालेका पुरुषोत्तम पौडेल तेस्रो स्थानमा रहेका छन् । उनले १६६ मत प्राप्त गर्दा राष्ट्रिय स्वतन्त्र पार्टीका रमेश खरेल ८० मतसहित चौथो स्थानमा छन् । निर्धारित समय भन्दा ढिला गरी मगगणना शुरु भएको हो ।
बिहान ८ बजे बसेको सर्वदलीय बैठकले बिहान ११ बजेदेखि मतगणना शुरु गर्ने निर्णय गरेको थियो । तर दलका प्रतिनिधि आउन ढिला भएपछि डेढ घण्टा ढिला गरी मतगणना भइरहेको हो ।
यसअघि हिजो राति नै मतगणना शुरु गर्नका लागि सर्वदलीय बैठक बस्ने भनिए पनि हावाहुरीका कारण बैठक बस्न सकेको थिएन ।
बारा २ मा ६५ प्रतिशत मत खसेको थियो । त्यहाँबाट ३४ उम्मेदवार चुनावी मैदानमा रहे पनि यादव र कुशवाहाबीच टक्कर हुने अनुमान गरिएको छ ।
उपनिर्वाचनअन्तर्गत हिजो सम्पन्न मतदानमा ६६ हजार ७३८ मत खसेको थियो । यहाँ कुल एक लाख ५ हजार २४८ मतदाता छन् ।
