काठमाडौँ। बुद्ध पूर्णिमाका अवसरमा गौतम बुद्धको जन्मस्थल नेपालको लुम्बिनी भ्रमण गर्ने भारतीय प्रधानमन्त्री नरेन्द्र मोदीले कार्यक्रमले तीव्रता पाएको छ। गौतम बुद्धको २ हजार ५ सय ६६ औँ जन्म जयन्तीको अवसर पारेर युनेस्कोको निमन्त्रणामा मोदी मे १६ मा लुम्बिनी भ्रमणमा आउने भएका हुन्।
युनेस्कोले सन् १९९७ मा विश्व सम्पदा सूचिमा समावेश गरेको लुम्बिनी विश्वभरका बौद्ध धर्मावलम्बीहरूका लागि सबैभन्दा पवित्र स्थल हो। मोदी कुशीनगरबाट हेलिकोप्टरमा लुम्बिनी अवतरण गर्ने छन्। अहिले लुम्बिनी क्षेत्रमा चार वटा हेलिप्याडको निर्माण भइरहेको छ।
मे १६ मै गौतम बुद्ध अन्तर्राष्ट्रिय विमानस्थलको उद्घाटनसमेत गर्नका लागि प्रधानमन्त्री शेरबहादुर देउवाले पनि लुम्बिनीको भ्रमण गर्ने कार्यक्रम रहेको छ। देशको दोस्रो अन्तर्राष्ट्रिय विमानस्थलको उद्घाटन गरेपछि देउवाले मोदीलाई स्वागत गर्नेछन्।
दुवै नेताले मायादेवी मन्दिरमा पूजा अर्चना गर्ने छन् र त्यसपछि भारत सरकारको आर्थिक सहयोगमा बन्ने बौद्ध विहारको शिलान्यास गर्ने कार्यक्रम रहेको छ।
संस्कृति तथा पर्यटन मन्त्रालयको मातहतमा रहेको अन्तर्राष्ट्रिय बौद्ध महासङ्घमार्फत भारत सरकारले गुम्बा निर्माणका लागि एक अर्ब रुपैयाँभन्दा बढी खर्च गरिरहेको छ। मोदीले अशोक स्तम्भ र गौतम बुद्धले बुद्धत्व प्राप्त गरेको बोधिवृक्षको पनि भ्रमण गर्नेछन्।
देउवा र मोदीले विश्वभरका बौद्ध धर्मावलम्बीहरूको सहभागिता रहने कार्यक्रममा वार्ता र सम्बोधन गर्ने कार्यक्रम समेत रहेको छ। लुम्बिनीमा पाँच घण्टा लामो व्यस्तता पूरा गरी मोदी कुशीनगर हुँदै नयाँ दिल्ली फर्कनेछन्।
सन् २०१४ को अगस्तमा पहिलो पटक प्रधानमन्त्रीमा निर्वाचित भएपछि मोदीले नेपाल आएर लुम्बिनी, जनकपुर र मुक्तिनाथको भ्रमण गर्ने घोषणा गरेका थिए। उनले हिन्दु तीर्थस्थल मुक्तिनाथ र जनकपुरको भ्रमण गरे पनि लुम्बिनी भ्रमणको योजना बाँकी रहेको थियो।
सन् २०१४ मा प्रधानमन्त्री भएयता मोदीको यो पाँचौँ नेपाल भ्रमण हो र सन् २०१९ मा पुनः निर्वाचित भएपछिको यो पहिलो भ्रमण हो।
गत अप्रिलमा प्रधानमन्त्री शेरबहादुर देउवाले भारत भ्रमण गरेका थिए। सो क्रममा भारतीय प्रधानमन्त्री मोदीसँग भेट्नुका साथै दुई पक्षले विभिन्न सम्झौता र सम्झौतामा हस्ताक्षर गरेको थियो।
