काठमाडौँ । उत्तर कोरियाली नेता किम जोङ उनले आफ्नो देशको आणविक स्थितिलाई 'अपरिवर्तनीय' घोषणा गर्दै आणविक कार्यक्रम कुनै पनि हालतमा नत्याग्ने स्पष्ट सन्देश दिएका छन्। सर्वोच्च जनसभामा नीतिगत सम्बोधन गर्दै उनले शत्रु शक्तिहरूका विरुद्ध आक्रामक सङ्घर्ष जारी राख्ने र आत्मरक्षाका लागि आणविक प्रतिरोध क्षमतालाई अझ सुदृढ बनाउने प्रतिबद्धता व्यक्त गरे। किमले उत्तर कोरिया अब आणविक निशस्त्रीकरणको दिशामा कहिल्यै नफर्कने जिकिर गर्दै अमेरिका र दक्षिण कोरियालाई कडा चेतावनी समेत दिएका छन्।

सम्बोधनका क्रममा किमले अमेरिकाले इरानमाथि गरेको सैन्य कारबाहीलाई 'राज्य आतङ्कवाद' को संज्ञा दिँदै विश्वव्यापी शक्ति प्रदर्शन गर्ने अमेरिकी प्रवृत्तिको आलोचना गरे। उनले दक्षिण कोरियालाई 'सबैभन्दा शत्रु राष्ट्र' घोषणा गर्दै छिमेकी मुलुकसँगको सम्बन्धलाई पूर्ण रूपमा अस्वीकार र बेवास्ता गरिने बताए। दक्षिण कोरियाली राष्ट्रपति ली जे म्युङले बिना पूर्वशर्त वार्ताका लागि गरेको प्रस्तावलाई प्योङयाङले लगातार बेवास्ता गर्दै आएको छ।

अन्तर्राष्ट्रिय प्रतिबन्ध र कूटनीतिक दबाबका बाबजुद उत्तर कोरियाले उन्नत प्रक्षेपण प्रणाली र ठोस इन्धनयुक्त अन्तरमहाद्वीपीय ब्यालेस्टिक क्षेप्यास्त्र विकास गरिसकेको अनुमान छ। विश्लेषकहरूका अनुसार इरान र भेनेजुएलाका हालैका घटनाक्रमले उत्तर कोरियालाई आफ्नो आणविक कार्यक्रम अझ तीव्र पार्न प्रेरित गरेको देखिन्छ। यद्यपि, वासिङ्टनले प्योङयाङसँग उच्चस्तरीय वार्ता पुनः सुरु गर्ने प्रयास गरिरहेको छ र राष्ट्रपति डोनाल्ड ट्रम्पसँग किमको सम्भावित भेटवार्ताको चर्चा समेत चलिरहेको छ।

आर्थिक मोर्चामा किमले आणविक कार्यक्रम कायम राख्दै पनि समृद्धि हासिल गर्न सकिने दाबी गरे। उनले आगामी पाँच वर्षमा औद्योगिक उत्पादन १.५ गुणाले वृद्धि गर्ने लक्ष्य राखेका छन्। साथै, सन् २०२६ का लागि कुल बजेटको १५.८ प्रतिशत हिस्सा रक्षा क्षेत्रमा खर्च गर्ने जानकारी दिँदै उनले सैन्य सुदृढीकरणलाई नै प्राथमिकतामा राखेका छन्। किमको यो पछिल्लो अभिव्यक्तिले कोरियाली प्रायद्वीपमा सुरक्षा चुनौती र तनाव अझै बढ्ने सङ्केत गरेको छ।