झापा । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले देशको समग्र विकासका लागि भौतिक पूर्वाधार, सामाजिक चेतना र राष्ट्रिय एकतामा जोड दिएका छन् । 

झापाको गौरीगञ्जमा आयोजित कार्यक्रममा उनले आफ्नो पार्टीले शुरू गरेका विकास आयोजना जनताको जीवनस्तर सुधारमा प्रभावकारी रहेको दाबी गरे । समृद्ध नेपालको अभियानलाई सफल बनाउन सबै पक्षले एकजुट हुनुपर्ने उनको भनाइ छ।

पूर्वप्रधानमन्त्री ओलीले २६-२७ सालदेखि नै झापाको विकासमा सक्रिय रहेको स्मरण गर्दै विगतमा उपहास गरिएका हुलाकी राजमार्ग र ठूला पुलहरू आज सफलतापूर्वक सञ्चालनमा आएको बताए। 

केही ठाउँमा ठेकेदार वा इन्जिनियरको त्रुटिका कारण काम रोकिएको भए पनि ती समस्या समाधान हुने उनको आश्वासन छ। उनले गरिबी र पछौटेपनलाई संस्कृति होइन भनी छुट्याउनुपर्नेमा जोड दिए र गुइँठा तथा दाउराको सट्टा बिजुली र स्वदेशी ग्यासको प्रयोग आवश्यक रहेको बताए।

साथै, ज्येष्ठ नागरिक, एकल महिला र अपाङ्गता भएका व्यक्तिको संरक्षण राज्यको दायित्व भएको उल्लेख गर्दै एमाले सरकारले यसलाई उच्च प्राथमिकता दिएको उनले स्पष्ट पारे ।

समाजमा फैलिएको बोक्सी प्रथा जस्ता कुप्रथालाई वैज्ञानिक चेतनाले हटाउनुपर्ने र शिक्षा नै विकासको मूल आधार भएकोले सबै बालबालिकालाई उच्च शिक्षासम्म पुर्याउन अभिभावकहरूलाई आग्रह गरे।

राजनीतिक दृष्टिले उनले नेपालको अन्तर्राष्ट्रिय साख र विकास केवल एमालेको नेतृत्वमा मात्र सुरक्षित रहने दाबी गरे। 

अध्यक्ष ओलीले सामाजिक सद्भावका आधारमा राष्ट्रिय एकताको महत्व औँल्याउँदै जातका आधारमा विभाजन नगरी विचार, नीति र योजनामार्फत देश निर्माण गर्नुपर्नेमा जोड दिए। उनले भने, “जातका कुरा गरेर देश निर्माण हुँदैन, देश विचार, दृष्टिकोण, नीतिले बनाउँछ।”

अध्यक्ष ओलीले देशमा अझै पनि अन्धविश्वास र पिछडापन रहेको भन्दै बोक्सी प्रथा र अन्य कुप्रथाबाट समाजलाई मुक्त गर्नुपर्नेमा जोड दिए।

उनले छोरी र छोराको शिक्षा अनिवार्य बनाउने र उच्च शिक्षासम्म पुर्याउने योजनालाई जोड दिए। बालबालिकालाई निःशुल्क पाठ्यपुस्तक, खानेकुरा र शैक्षिक सुविधा उपलब्ध गराएर शिक्षा क्षेत्रमा सुधार ल्याउन आवश्यक रहेको उनको भनाइ छ।

उनले कार्यकर्ताहरुलाई जातिवादभन्दा माथि उठेर भ्रमको राजनीतिबाट सचेत रहन र राष्ट्र निर्माणमा सक्रिय भूमिका निर्वाह गर्न निर्देशन दिए। साथै, पछाडि परेका स्थानहरूमा विकासका काम तीव्र बनाउँदै बिजुली र ग्यास जस्ता आधारभूत सुविधाहरू पुर्याउनुपर्नेमा जोड दिए।

अध्यक्ष ओलीको यो कार्यक्रमले केवल विकास परियोजना प्रदर्शन मात्र नभई सामाजिक चेतना, शिक्षा र राष्ट्रिय एकताको सन्देश पनि स्थानीय जनतामा पुर्याएको छ।

उनले अविकसित, पिछडिएका क्षेत्रमा दिगो विकास र समान अवसर सुनिश्चित गर्न आवश्यक पहल गर्नुपर्ने कुरामा जोड दिए।