पश्चिम बङ्गालमा निपाह भाइरसको सङ्क्रमण: दुई जनामा पुष्टि भए पनि अवस्था नियन्त्रणमा
हाम्रा कुरा
प्रकाशित २०८२ माघ १४ बुधबार
2k
Shares
काठमाडौँ । भारतको पश्चिम बङ्गाल राज्यमा 'निपाह भाइरस'का दुईवटा सङ्क्रमण पुष्टि भए पनि अवस्था पूर्ण नियन्त्रणमा रहेको स्वास्थ्य अधिकारीहरूले बताएका छन्। भारतको स्वास्थ्य मन्त्रालयले मङ्गलबार राति विज्ञप्ति जारी गर्दै उन्नत निगरानी र प्रयोगशाला परीक्षणका कारण सङ्क्रमण थप फैलिन नदिइएको स्पष्ट पारेको छ।
सङ्क्रमित व्यक्तिहरूको सम्पर्कमा आएका १९६ जनाको पहिचान गरी परीक्षण गर्दा सबैको नतिजा नकारात्मक आएको मन्त्रालयले जनाएको छ। विश्व स्वास्थ्य सङ्गठनका अनुसार निपाह भाइरस जनावरबाट मानिसमा सर्ने र ४० देखि ७५ प्रतिशतसम्म मृत्युदर भएको अत्यन्तै घातक भाइरस हो। हालसम्म यसको कुनै ठोस खोप उपलब्ध नभएकाले पनि यसलाई उच्च जोखिमपूर्ण मानिन्छ।
भारतमा यसअघि सन् २००१ मा पश्चिम बङ्गाल र पछिल्ला वर्षहरूमा केरलामा निपाहको प्रकोप देखिएको थियो, जसबाट कैयौँको ज्यान गएको थियो। फल खाने चमेरा यस भाइरसका मुख्य वाहक हुन्। स्वास्थ्य विज्ञहरूले उच्च ज्वरो, बान्ता र श्वासप्रश्वासमा समस्याजस्ता लक्षण देखिए तुरुन्त चिकित्सकको सल्लाह लिन र सतर्कता अपनाउन आग्रह गरेका छन्। हालको अवस्थामा जनस्वास्थ्यका सबै मापदण्ड कार्यान्वयनमा रहेकाले त्रसित नहुन तर सजग रहन मन्त्रालयले अपिल गरेको छ।
