काठमाडौँ। अमेरिकी रक्षा मन्त्रालय (पेन्टागन) ले अमेरिकी सेनाको समाचार सम्प्रेषण गर्ने सञ्चारमाध्यममाथि थप नियन्त्रणका नयाँ नियमहरू लागू गरेको छ। शुक्रबार पत्रकारहरूलाई वितरण गरिएको जानकारी पत्रमा उल्लेख भएअनुसार, पत्रकारहरूले आधिकारिक रूपमा प्रकाशनको लागि अधिकृत नभएको कुनै पनि जानकारी सार्वजनिक गर्न पाउने छैनन्। साथै, उनीहरूको सैन्य विभागभित्रको आवागमन पनि सीमित गरिनेछ।

यो नयाँ निर्देशनअनुसार, पत्रकारहरूले एक शपथ पत्रमा हस्ताक्षर गर्नुपर्नेछ, अन्यथा उनीहरूले सैन्य गतिविधिमा पहुँच गुमाउनेछन्। यो कदम राष्ट्रपति डोनाल्ड ट्रम्पले नकारात्मक सञ्चार सामग्री ‘अवैध’ हुन सक्ने सुझाव दिएपछि प्रशासनले चालेको पछिल्लो कदम हो।

पेन्टागनले आफू 'जवाफदेहिता र जनताको विश्वास प्रवद्र्धन गर्न पारदर्शिता'प्रति प्रतिबद्ध रहेको बताए पनि नयाँ नियमहरूले अज्ञात स्रोतहरूलाई उद्धृत गरी सामग्री प्रकाशन गर्नमा प्रतिबन्ध लगाएको छ। कुनै पनि सूचना सार्वजनिक गर्नुअघि एक उपयुक्त अधिकारीद्वारा स्वीकृत हुनुपर्नेछ, चाहे त्यो वर्गीकृत नभएको जानकारी नै किन नहोस्।

रक्षा मन्त्री पिट हेगसेथले सामाजिक सञ्जाल एक्समा लेखे, "प्रेसले पेन्टागन चलाउँदैन।" उनले अगाडि भने, "प्रेसलाई अब सुरक्षित सुविधाको हलमा घुम्न अनुमति छैन। बिल्ला लगाउनुहोस् र नियमहरू पालना गर्नुहोस्, वा घर जानुहोस्।" यी नियमहरू हेगसेथले यमनका हुथी विद्रोहीहरूमाथि भएको अमेरिकी हवाई आक्रमणको समय खुलासा गरेको आरोपपछि आएका हुन्।

नयाँ नियमहरूको आलोचना गर्दै, द न्यूयोर्क टाइम्सका प्रवक्ताले यसलाई 'करदाताको खर्चमा अमेरिकी सेनाले गरिरहेको कार्यमा पहुँच घटाउने चिन्ताजनक ढाँचामा अर्को कदम' भनेका छन्।

नेसनल प्रेस क्लबका अध्यक्ष माइक बाल्सामोले पेन्टागनलाई नयाँ नियमहरू तत्काल खारेज गर्न आग्रह गरेका छन्। उनले एक विज्ञप्तिमा भने, "यदि हाम्रो सेनाको बारेमा समाचार पहिले सरकारले अनुमोदन गर्नुपर्छ भने, तब जनताले स्वतन्त्र रिपोर्टिङ पाउँदैनन्।" उनले यी प्रतिबन्धहरूले केवल अधिकारीहरूले हेर्न चाहेको कुरा मात्र सार्वजनिक हुने र यसले हरेक अमेरिकीलाई चिन्तित बनाउनुपर्ने बताए।