काठमाडौं। प्रधानमन्त्री केपी शर्मा ओली चीनको पाँच दिने औपचारिक भ्रमण सम्पन्न गरी बुधबार राति स्वदेश फर्केका छन्। चिनियाँ राष्ट्रपति सी चिनफिङको निमन्त्रणामा उनी सांघाई सहयोग संगठन (एससीओ) को २५ औं शिखर सम्मेलनमा सहभागी हुन भदौ १४ गते चीन प्रस्थान गरेका थिए।
भ्रमणका क्रममा प्रधानमन्त्री ओलीले चिनियाँ राष्ट्रपति सीसँगको भेटमा लिपुलेक पास को मुद्दा जोडदार रूपमा उठाए। परराष्ट्र सचिव अमृत बहादुर राईका अनुसार, प्रधानमन्त्रीले नेपाललाई जानकारी नदिई भारत र चीनबीच लिपुलेकमा व्यापार नाका सञ्चालन गर्ने सम्झौताप्रति नेपालको कडा आपत्ति रहेको स्पष्ट पारे। उनले लिपुलेक नेपालको भूभाग भएको र चीनले यो कुरा बुझ्नुपर्नेमा जोड दिए।
प्रधानमन्त्री ओलीले रुसी राष्ट्रपति भ्लादिमिर पुटिन सँग पनि भेटवार्ता गरे। भेटमा उनले पुटिनलाई नेपाल भ्रमणको निम्तो दिए भने पुटिनले पनि ओलीलाई रुस भ्रमणको निमन्त्रणा दिए। तियान्जिनमा आयोजित एससीओ शिखर सम्मेलनलाई सम्बोधन गर्दै उनले नेपाललाई संगठनको पूर्णकालीन सदस्यता दिन आग्रह गरे। उनले बेल्ट एन्ड रोड इनिसिएटिभ (बीआरआई) लगायतका परियोजनाहरू शीघ्र कार्यान्वयन हुने विश्वास व्यक्त गर्दै नेपालको विकासमा चीनको सहयोगप्रति धन्यवाद दिए।
प्रधानमन्त्री ओली बेइजिङमा आयोजित ‘चिनियाँ जनताको जापानी आक्रमणविरुद्धको प्रतिरोध युद्ध’ को ८० औं विजयोत्सव समारोह र सैनिक परेडमा पनि सहभागी भएका थिए। परराष्ट्र सचिव राईले यो भ्रमणले नेपाल-चीन सम्बन्धलाई थप सुदृढ बनाएको, लिपुलेक मुद्दामा नेपालको अडान स्पष्ट रूपमा राखिएको र एससीओमा नेपालको पूर्णकालीन सदस्यताको सम्भावना बढेको बताए।
प्रधानमन्त्रीको प्रतिनिधिमण्डलमा उनकी धर्मपत्नी श्रीमती राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, नेपाली कांग्रेसका नेता पूर्णबहादुर खड्का लगायतका उच्च अधिकारीहरू सहभागी थिए।
