भोजपुर । भोजपुरको टेम्केमैयुङ गाउँपालिका-९, लेखर्कमा रहेको पाँचधारे बजार पहिरोको उच्च जोखिममा परेको छ। बस्तीको माथिल्लो डाँडामा जमिन चर्किएर पहिरो जान थालेपछि बजारका घरहरू खतरामा परेका हुन्।
टेम्केमैयुङ-९ का वडाध्यक्ष नभराज माङ्गपाहाङ्गका अनुसार, बजारको माथिल्लो भागमा रहेको डाँडामा ढुङ्गा उत्खनन गरिएकाले जमिन चर्किएको हो। यसले गर्दा पहिरोको जोखिम बढेको उनको भनाइ छ। अहिले सामान्य पहिरो चलिरहेको र ठूलो वर्षा भएमा बस्तीमा ठूलो क्षति हुन सक्ने उनले बताए।
वडाध्यक्ष माङ्गपाहाङ्गका अनुसार, बजार क्षेत्रका आठवटा घर पहिरोको प्रत्यक्ष जोखिममा छन्। उनले यो विपद् र क्षतिको बारेमा प्रहरी मुचुल्कासहित सम्बन्धित निकायमा जानकारी गराए पनि कुनै सुनुवाइ नभएको बताएका छन्। समयमै रोकथामका उपाय नअपनाएमा ठूलो क्षति हुन सक्ने जोखिम रहेको उनले औंल्याए।
