काठमाडौँ । मलेसियामा जारी एसीसी मेन्स यू–१६ इस्ट जोन कप क्रिकेट प्रतियोगिताको उपाधि जित्न नेपालले मात्र ११४ रनको चुनौती पछ्याउँदैछ । 

उपाधिका लागि फाइनलमा नेपाल र सिंगापुर भिडिरहेका छन् । बांगीमा भइरहेको खेलमा टस जितरे पहिले ब्याटिङ गरेको सिंगापुरले ११३ रनमात्र बनाउन सक्यो । सिंगापरले ४०.५ ओभर खेलेर अलआउट भयो । 

नेपालका लागि अभय यादव र सुशीलबहादुर रावलले समान ३, शुभम खनालले २ तथा विपिनप्रसाद शर्माले १ विकेट लिए । 

नेपालले समूह चरणमै सिंगापुरमाथि ६ विकेटको जित हासिल गरेको हुनाले फाइनल पनि जित्ने अपेक्षा गरिएको छ । 

यो प्रतियोगितामा नेपालमात्र अपराजित टिम हो । 

सेमिफाइनलमा नेपालले मलेसियालाई र सिंगापुरले हङकङलाई हराएको थियो । नेपालले यो प्रतियोगिताभर उच्च स्कोर खडा गरेको छ । 

नेपालले मलेसियालाई सेमिफाइनलमा नौ विकेटले हराउँदै फाइनलमा स्थान बनाएको हो । ९१ रनको झिनो चुनौती नेपालले ११.४ भोभरमै १ विकेटको क्षतिमा पूरा गर्यो । नेपालका लागि परिमार्जन यादवले ३५ बलमा अविजित रहँदै ५९ तथा श्रीवांश बजगाईंले २२ बलमा अविजित रहँदै २३ रन बनाए। 

यसअघि खेलमा नेपालले टस जितेर पहिले फिल्डिङ गर्दै मलेसियालाई सस्तैमा समेट्यो । मलेसियाले ४३.१ ओभरमा अलआउट हुँदै ९० रनमात्र बनायो । 

मलेसियाका लागि मोहम्मद फातुल मुइनले सर्वाधिक ३८ रन बनाए । नेपालका लागि अभय यादवले १५ रन खर्चेर ४ तथा शुबम खनालले १२ रन खर्चेर ३ विकेट लिए ।

नेपालको समूह चरण

यसअघि नेपालले समूह चरणमा शानदार प्रदर्शन गर्ने क्रममा भुटानमाथि २९८ रनको जितसहित हासिल गरेको थियो । ३५९ रनको चुनौती पछ्याएको भुटान ६० रनमा अलआउट भयो । नेपालका लागि विपिनप्रसाद शर्माले १० ओभरमा ६ मेडन राख्दै ७ रन खर्चेर ४ विकेद्ध लिए ।

यसअघि टस जितेर पहिले ब्याटिङ गरेको नेपालले ५ विकेटको क्षतिमा ३५८ रन बनायो । रौनक श्रीवास्तवले १३२ बलको सामना गर्दै १६८ रन बनाए । उमेर समूहमा यो नै कुनै पनि नेपाली ब्याट्सम्यानको उच्च योगफल हो ।

त्यस्तै इन्डोनेसियालाई नेपालले ३७० रनले हराएको थियो । नेपालले ५ विकेटको क्षतिमा ४२० रन बनाएको थियो । प्रसिद्द जैसीले १३२ तथा रौनक श्रीवास्तवले ८८ रन जोडेका थिए । जवाफमा इन्डोनेसिया विपिनप्रसाद शर्माको ६ विकेटको मद्धतले ५० रनमा अलआउट गर्यो ।

नेपालले जापानलाई ९ विकेटले हराउँदा सिंगापुरलाई ६ विकेटले पराजित गरेको थियो ।