काठमाडौँ । आईसीसी क्रिकेट विश्वकप लिग २ अन्तर्गत स्कटल्याण्ड भ्रमणमा रहेको नेपालले त्रिकोणात्मक श्रृंखलाको अन्तिम खेलमा अहिले नेदरल्याण्ड्ससँग खेलिरहेको छ ।
स्कटल्याण्डको डुन्डीमा भइरहेको खेलमा विजयका लागि नेदरल्याण्ड्सले २३७ रनको चुनौती पाएको छ । खेलमा नेपालले टस हारेर पहिले ब्याटिङ गर्दैै निर्धारित ५० ओभरमा ९ विकेटको क्षतिमा २३६ रन बनायो ।
नेपालका लागि आरिफ शेख लयमा देखिएका छन् । उनले यो खेलमा ८५ बलमा ८४ रन बनाए । त्यस्तै भीम सार्की र रोहित पौडेलले समान ३५ रन बनाए । डेब्यु खेलाडी नन्दन यादवले अविजित रहँदै १० रन बनाए ।
पल भान मिकेरेनले ५८ रन खर्चेर ४ तथा माइकल लेभिटले ४९ रन खर्चेर ३ विकेट लिए ।
यो खेलमा घाइते भएका कारण सोमपाल कामी र गुल्सन झा खेलेका छैनन् ।
अंक तालिकामा कमजोर स्थितिमा रहेको नेपालले आफूलाई सुधार गर्न पनि यो खेल जित्नैपर्ने दबाब रहेको छ । यसअघि पहिलो खेलमा नेपालले नेदरल्याण्ड्सलाई नाजुक अवस्थामा रहेको नेपालले स्कटल्याण्ड भ्रमणलाई यादगार बनाउने लयमा भए पनि पछिल्लो खेलमा स्कटल्याण्डसँग २ रनले पराजित भएसँगै ह्याट्रिक जित टुक्रिएको थियो ।
अब अन्तिम खेल जितेर भने नेपालले आफूलाई फेरि खेलमा फर्काउन सक्छ ।
नेपालले पहिलो खेलमा स्कटल्याण्डलाई १ विकेटले हराएको थियो । दोस्रो खेलमा नेदरल्याण्ड्सलाई ५ विकेटले हराएको थियो । तेस्रो खेलमा नेपाल स्कटल्याण्डसँग २ रनले पराजित भयो । लयमै रहेको नेपालले आज पनि सहज जित हासिल गर्ने आशा गर्न सकिन्छ ।
एक दिवसीय क्रिकेटमै अहिलेसम्मको उच्च ३२४ रनको लक्ष्य पछ्याएको नेपाल तेस्रो खेलमा घरेलु टोलीसँग २ रनले पराजित भएको थियो ।
यद्यपि उक्त खेलमा बनाएको ३२१ रन नेपालले एक दिवसीय क्रिकेटमा बनाएको अहिलेसम्मकै सर्वाधिक योगफल हो ।
नेपालले रन पछ्याएर जितेको कीर्तिमानी रन भनेको २९७ रन हो । पहिलो खेलमा स्कटल्याण्डलाई हराउँदा नेपालले आफ्नो व्यक्तिगत कीर्तिमान बनाएको थियो ।
