पोखरा । तेस्रो एबीसी राष्ट्रिय भेट्रान्स फुटवल प्रतियोगितामा साविक विजेता ढोलाहिटी फ्रिडम भेट्रान्सले विजयी शुरुआत गरेको छ ।
सोमबारदेखि पोखरामा शुरु भएको प्रतियोगिताको दोस्रो खेलमा ढोलाहिटीले लेकसाइड भेट्रान्सलाई ४-० गोलले पराजित गरेको हो ।
ढोलाहिटीको तर्फबाट कृष्ण मालाकार एक्लैले चार गोल गरे । उनी प्लेयर अफ द म्याच समेत मालाकार नै घोषित भए ।
प्रतियोगिताको उद्घाटन खेलमा आयोजकलाई पराजित गर्दै एक्स वरियर अघिल्लो चरणमा प्रवेश गरेको छ ।
निर्धारित समयमा एक-एक गोलको बराबरीमा खेल सकिएपछि टाइब्रेकरमा आयोजकलाई ३-२ गोल अन्तरले पराजित गर्दै एक्स वरियर अघिल्लो चरणमा प्रवेश गरेको हो ।
उक्त खेलमा प्लेयर अफ दी म्याचको उपाधि एक्स वरियरका राम लक्ष्मण भुजेलले हात पारे ।
प्रतियोगिता उद्घाटन पोखरा महानगरका प्रमुख धनराज आचार्यले गरेका थिए ।
प्रतियोगितामा १० टिम सहभागी छ । प्रतियोगिता विजेताले एक लाख ५५ हजार पाँच सय ५५, उपविजेताले ७७ हजार सात सय ७७ रुपैयाँ नगद पुरस्कार ट्रफी र मेडल प्राप्त गर्ने क्लब सचिव विजय घिमिरेले जानकारी दिए ।
प्रतियोगिताअन्तर्गत मंगलबार चार खेल हुनेछन । जसमा पहिलो खेल एक्स वरियर र हेटौँडा भेट्रान्स, दोस्रो खेल चितवन भेट्रान्स र संगम भेट्रान्स, तेस्रो खेल ढोलाहिटी भेट्रान्स र एसएनकेसी भेट्रान्स तथा अन्तिम खेल कालिका स्पोर्टिङ क्लब रुपन्देही-११ र बगर भाइखलकबीच हुने आयोजकले जनाएको छ ।
