कपिलवस्तु । बुद्धभूमि नगरपालिकामा भएको शल्यक्रियासहितको दुई दिने निःशुल्क आँखा शिविरबाट ९ सय २४ जना लाभान्वित भएका छन् ।
बुधबार र बिहीबार भएको उक्त शिविरमा ९२४ जनाको आँखा चेकजाँच गरी आवश्यकता अनुसार औषधी वितरण गरिएको छन्द ’कालेबाबु’ नारायणी आँखा अस्पताल बहादुरगंजका कार्यक्रम संयोजक हरि भण्डारीले जानकारी दिए ।
दुई दिनको अवधिमा मोतियाविन्दुको समस्या भएका २ सय जनाको निःशुल्क अप्रेसन गरिएको उनले जानकारी दिए । अप्रेसन पश्चात उनीहरुलाई औषधी र चस्मासमेत वितरण गरिएको उनले जानकारी दिए ।
नगरप्रमुख केशवकुमार श्रेष्ठले नगरपालिकाभित्र कोही पनि आँखाको समस्याले दृष्टिविहीन हुन नपरोस् भन्ने उद्देश्यका साथ शिविर आयोजना गरिएको र त्यसले सार्थकता पाएको बताए ।
उनले आर्थिक स्थिति कमजोर भई तथा वृद्ध अवस्थाका कारण अस्पतालमै जान नसक्ने नगरवासीले शिविरको फाइदा लिएको बताए । आँखा शिविरलाई विगतदेखि नै नगरपालिकाले प्राथमिकता दिँदै नगरका विभिन्न स्थानमा निरन्तर रुपमा संचालन गर्दै आएको उनले बताए ।
सेवाग्राहीले मोतियाविन्दुको निःशुल्क अप्रेशन गरेर आँखाको दृष्टि फर्कदाँ नयाँ संसार देख्न पाएको भन्दै खुशी व्यक्त गरेका थिए । आँखा देख्न नसक्दा हरेक क्षण समस्या झेल्नुपर्ने बाध्यात्मक अवस्थाको अब अन्त्य भएकाले बुढ्यौलीमा आँखा देख्न पाउँदा संसार नै उज्यालो भएको उनीहरुको भनाइ छ ।
बुद्धभूमि नगरपालिकाको आयोजना र नेपाल नेत्रज्योति संघ आँखा स्वास्थ्य कार्यक्रम राप्ती तथा बहादुरगंजद्वारा संचालित छन्द ’कालेबाबु’ नारायणी आँखा अस्पताल बहादुरगंजको प्राविधिक सहयोगमा भएको हो ।
