काठमाडौँ । नेपाल प्रिमियर लिग (एनपीएल) टी–२० क्रिकेटको १५ औँ खेलमा सुदूरपश्चिम रोयल्स पराजित भएको छ ।
त्रिवि क्रिकेट मैदान कीर्तिपुरमा सुदूरपश्चिम रोयल्स र चितवन राइनोजसँग ३३ रनले पराजित भएको हो ।
योसँगै सुदूरपश्चिमको अपराजित यात्रा टुंगिएको छ ।
खेलमा चितवनले पहिले ब्याटिङ गर्दै ५ विकेटको क्षतिमा १६४ रन बनायो । हसन एसखिलले ६५ तथा रवि बोपाराले ३६ रन बनाए । स्कट कुगेलेजिनले २ विकेट लिए ।
जवाफमा सुदूरपश्चिमले १८.२ ओभरमा अलआउट हुँदै १३१ रनमात्र बनायो । इशान पाण्डेले सर्वाधिक ३५ रन बनाएको इनिङ्सलाई सस्तैमा समेट्ने क्रममा रिजन ढकाल, कुशल मल्ल, जान किकोल लोफ्टी इटन र अमर राउटेलाले समान २ विकेट लिए ।
यो खेलसँगै सुदूरको अपराजित यात्रा टुंगिँदा अब शीर्ष स्थानको जनकपुर बोल्ट्समात्र अपराजित बचेको छ ।
सुदूरपश्चिम विजयी भएमा ४ खेलमा ८ अंकसहित शीर्ष स्थानमा पुग्नेछ ।
अंकतालिका
४ खेलमा ८ अंकसहित जनकपुर शीर्ष स्थानमा रहेको छ । ४ खेलबाट ६ अंकसहित सुदूरपश्चिम दोस्रो स्थानमा छ । ४ खेलबाटै ६ अंकको चितवन तेस्रो स्थानमा छ ।
कर्णाली याक्सको ४ खेलबाट ४ अंक छ भने पोखरा, काठमाडौँ र विराटनगरको २–२ अंक छ ।
अंकविहीन लुम्बिनी पुछारमा छ ।
सोमबार विश्राम हुनेछ । अर्थात् कुनै पनि खेल छैनन् ।
यसअघिका खेल
–१४ औँ खेलमा जनकपुर बोल्ट्सले सनसनीपूर्ण जित हासिल गरेको छ । जनकपुरले लुम्बिनी लायन्समाथि एक रनको सनसनीपूर्ण जित हासिल गरेको हो ।
–१३ औँ खेलमा कर्णाली याक्सले विराटनगर किंग्सलाई ७ रनले पराजित गरेको छ ।
–१२ औँ खेलमा सुदूरपश्चिम रोयल्सले लुम्बिनी लायन्सलाई ४५ रनले पराजित गरेको छ ।
–११ औँ खेलमा पोखरा एभेन्जर्सले कीर्तिमानी जित हासिल गरेको छ । पोखराले लुम्बिनी लायन्समाथि १० विकेटको कीर्तिमानी जित हासिल गरेको हो । एन्द्रेस गोसले ५५ बलमा १०४ रन बनाए । यो पहिलो शतक हो ।
–दशौँ खेलमा कर्णाली याक्सले चितवन राइनोजलाई ६ विकेटले हरायो ।
– नवौँ खेलमा काठमाडौँ गुर्खाजमाथि ७३ रनको जित हासिल गर्दै सुदूरपश्चिम रोयल्सले लगातार दोस्रो जित हासिल गर्यो ।
– आठौँ खेलमा जनकपुर बोल्ट्सले पोखरा एभेन्जर्सलाई ७ विकेटले पराजित गर्यो ।
–सातौँ खेलमा विराटनगर किंग्सले लुम्बिनी लाइन्समाथि २ विकेटको रोमाञ्चक जित हासिल गर्दै पहिलो जित हासिल गरेको छ । लुम्बिनीबाट पाएको १९२ रनको फराकिलो चुनौती विराटनगरले १९.५ ओभरमा ८ विकेटको क्षतिमा पूरा गर्यो ।
– छैटौँ खेलमा काठमाडौँ गुर्खाज विजयी भएको छ । काठमाडौँले कर्णाली याक्सलाई ४ विकेटले पराजित गरेको हो ।
– पाँचौ खेलमा चितवन राइनोजले पोखरा एभेन्जर्सलाई हराएको छ । पोखरा ८८ रनले पराजित भएको हो ।
– चौथो खेलमा सुदूरपश्चिम रोयल्सले विराटनगर किंग्सलाई ९० रनले हरायो । सुदूरले ७ विकेटको क्षतिमा १८२ रन बनाएकामा विराटनगर ९२ रनमा समेटियो ।
– तेस्रो खेलमा जनकपुर बोल्टसले कर्णाली याक्समाथि ८ विकेटको जित हासिल गरेको हो ।
–दोस्रो खेलमा चितवन राइनोज विजयी भएको छ । विजयी शुरुआत गर्ने क्रममा चितवनले काठमाडौँ गुर्खाजलाई ५ विकेटले पराजित गरेको हो ।
–उद्घाटन खेलमा जनकपुर बोल्टसले विराटनगर किंग्समाथि शानदार ८ विकेटको जित हासिल गरेको थियो ।
