काठमाडौँ । नेपाल प्रिमियर लिग (एनपीएल) टी–२० क्रिकेटमा अहिले लुम्बिनी लायन्स र पोखरा एभेन्जर्स खेलिरहेका छन् ।
त्रिवि कीर्तिपुर मैदानमा लुम्बिनीले जितका लागि पोखरालाई १७१ रनको चुनौती दिएको छ ।
टस जितेर लुम्बिनीले पहिले ब्याटिङ गर्दै कप्तान रोहित पौडेलको कप्तानी इनिङ्सले ५ विकेटको क्षतिमा १७० रन बनायो ।
रनआउट हुनुपूर्व रोहितले ५९ बलमा ९५ रन बनाए । जारी एनपीएलमा यो एक खेलाडीको सबैभन्दा बढी रन हो ।
चौथो विकेटका लागि रोहितसँग मिलेर ११० रनको साझेदारी गर्ने क्रममा टम मोर्सले रनआउट हुनुअघि ३८ बलमा ४५ रन बनाए ।
पोखराका लागि बिपिन खत्रीले २ विकेट लिए ।
दुवै टिम पहिलो जितको खोजीमा छन् । लुम्बिनीले एक खेल हारेको छ भने पोखराले दुवै खेल हारेर पुछारमा छ । अहिलेसम्म यी दुई टिमले मात्र अंकको खाता खोलेका छैनन् ।
यो खेलपछि एक टिममात्र अंकविहीन बन्नेछ ।
यसअघिका खेल
–दशौँ खेलमा कर्णाली याक्सले चितवन राइनोजलाई ६ विकेटले हरायो ।
– नवौँ खेलमा काठमाडौँ गुर्खाजमाथि ७३ रनको जित हासिल गर्दै सुदूरपश्चिम रोयल्सले लगातार दोस्रो जित हासिल गर्यो ।
– आठौँ खेलमा जनकपुर बोल्ट्सले पोखरा एभेन्जर्सलाई ७ विकेटले पराजित गर्यो ।
–सातौँ खेलमा विराटनगर किंग्सले लुम्बिनी लाइन्समाथि २ विकेटको रोमाञ्चक जित हासिल गर्दै पहिलो जित हासिल गरेको छ । लुम्बिनीबाट पाएको १९२ रनको फराकिलो चुनौती विराटनगरले १९.५ ओभरमा ८ विकेटको क्षतिमा पूरा गर्यो ।
– छैटौँ खेलमा काठमाडौँ गुर्खाज विजयी भएको छ । काठमाडौँले कर्णाली याक्सलाई ४ विकेटले पराजित गरेको हो ।
– पाँचौ खेलमा चितवन राइनोजले पोखरा एभेन्जर्सलाई हराएको छ । पोखरा ८८ रनले पराजित भएको हो ।
– चौथो खेलमा सुदूरपश्चिम रोयल्सले विराटनगर किंग्सलाई ९० रनले हरायो । सुदूरले ७ विकेटको क्षतिमा १८२ रन बनाएकामा विराटनगर ९२ रनमा समेटियो ।
– तेस्रो खेलमा जनकपुर बोल्टसले कर्णाली याक्समाथि ८ विकेटको जित हासिल गरेको हो ।
–दोस्रो खेलमा चितवन राइनोज विजयी भएको छ । विजयी शुरुआत गर्ने क्रममा चितवनले काठमाडौँ गुर्खाजलाई ५ विकेटले पराजित गरेको हो ।
–उद्घाटन खेलमा जनकपुर बोल्टसले विराटनगर किंग्समाथि शानदार ८ विकेटको जित हासिल गरेको थियो ।
