हैदाराबाद । भारतमा फिल्मको क्रेज कत्तिको छ भन्ने कुराको उदाहारण खोज्न टाढा जानै पर्दैन । फिल्मको प्रतिक्षा गर्दा निकै समय खर्चेका दर्शकले सजिलै फिल्म हेर्न पाउने पनि अवस्था छैन । 

यसैबीच अल्लु अर्जुनको फिल्म ‘पुष्पा २’ को बुधबार मध्यरात हैदराबादको आरटीसी इन्टरसेक्शनमा रहेको सन्ध्या थिएटरमा प्रिमियर भएकामा भागदौड मच्चिदा फिल्म हलमा चल्नुअघि नै अनिष्ट आइलाग्यो । 

यस प्रिमियरमा अल्लु अर्जुन र रश्मिका मन्डन्ना पनि उपस्थित थिए। आफ्नो मनपर्ने स्टारलाई हेर्न ठूलो संख्यामा मानिसहरु त्यहाँ पुगेपछि भागदौड मच्चिँदा अहिलेसम्म कम्तीमा दुई जनाको मृत्यु भएको छ । 

घटनास्थलमै एक महिलाको मृत्यु भएको थियो भने दुई जना घाइते भएका थिए । स्थिति नियन्त्रणमा लिन प्रहरीले लाठीचार्जसमेत गर्नुपरेको थियो । तर अहिले अस्पतालमा थप एक जनाको मृत्यु भएसँगै मृत्यु हुनेको संख्या दुई पुगेको छ ।

दिलसुखनगर निवासी ३९ वर्षीया रेवती पति भास्कर र दुई छोरासँग स्क्रिनिङमा गएकी थिइन् । रेवती र उनको परिवार थिएटरबाट बाहिर आउँदा भागदौड मच्चियो।

समाचार अनुसार फ्यानहरू अल्लु अर्जुनको झलक हेर्न थिएटरमा पुगे र मानिसहरूलाई बाहिर धकेलाधकेल भएको थियो । यस घटनामा रेवती र उनका छोरा श्री तेज बेहोस हुन पुगेका थिए ।

प्रहरी कर्मचारी र दर्शकहरूले तुरुन्तै रेवती र उनको छोरालाई सीपीआर दिए, जसलाई पछि नजिकैको अस्पताल लगियो। छोरालाई सुपर स्पेशलिटी अस्पतालमा सारिएको थियो, जहाँ उनको अवस्था गम्भीर थियो । तर चोटका कारण रेवतीको पनि मृत्यु भयो । रेवतीको शव पोस्टमार्टमका लागि गान्धी अस्पताल लगिएको छ । 

 अहिले अस्पतालमा भर्ना भएका अर्का बिरामीको मृत्यु भएको खबर आएको छ । यसको मतलब यो प्रिमियरमा भएको भागदौडका कारण दुई जनाको ज्यान गएको हो । एक जना घाइते भएका छन् । अल्लु अर्जुन कार्यक्रममा आएको खबर फैलिएपछि स्थिति नियन्त्रण बाहिर गएको प्रत्यक्षदर्शीले बताए । फ्यानहरूले सुपरस्टारको नजिक जान खोज्दा ठूलो भीड जम्मा भयो, जसले अराजकता निम्त्यायो।

 घटनास्थलमा पहिल्यैदेखि तैनाथ प्रहरीले भीडलाई तितरबितर पार्न हल्का लाठीचार्ज गरेको थियो तर कोलाहलका कारण रेवती र उनका छोराको झडपमा मृत्यु भएको थियो । अधिकारीहरूले क्षेत्रलाई घेरा हालेका थिए, थिएटरका गेटहरू बन्द गरेका थिए र भीडलाई नियन्त्रण गर्न थप बलहरू बोलाइएको थियो ।

 तर, स्थिति नियन्त्रणमा लिन हम्मे हम्मे परेको भारतीय सञ्चारमाध्यमले जनाएका छन् ।