काठमाडौँ । बलिउड अभिनेता गोविन्दालाई गोली लागेको छ । उनको खुट्टामा गोली लागेको हो ।
उनको आफ्नै पेस्तोलबाट गोली लागेको भारतीय सञ्चार माध्यमहरुले स्रोतको प्रयोग गर्दै लेखेका छन् ।
आज बिहान स्थानीय समयअनुसार ४ः४५ बजे उनलाई गोली लागेको हो । ६० वर्षीय गोविन्दाले आफ्नो पेस्तोल सफा गर्ने क्रममा मिस फायर भएर गोली लागेको हो ।
मुम्बई प्रहरीले समयमै पुगेर उनको पेस्तोल नियन्त्रणमा लिएको छ । यस सम्बन्धमा अनुसन्धान थालेको पनि प्रहरीले जनाएको छ ।
प्रहरी वरिष्ठ अधिकारी परमजीत सिंह दहियाले जुन पेस्तोलबाट गोली लागेको हो त्यसको लाइसेन्स भएको बताए ।
गोविन्दाको मुम्बईस्थित क्रिटी केयर अस्पतालमा उपचार भइरहेको छ । उनको खुट्टाबाट धेरै नै रगत बगेको छ । जसका कारण उनको स्वास्थ्य स्थिति गम्भीर बनेको छ ।
अस्पतालका अनुसार शुरुआती उपचारपछि गोविन्दा खतरामुक्त रहेका छन् ।
उनकी पत्नी सुनीता आहुजा अस्पतालमा गोविन्दासँगै छिन् । गोविन्दाकी आमा नेपाली हुन् । उनले नेपाललाई मामाघर भन्छन् भने चलचित्रकर्मीहरु उनलाई भान्जा भनेर बोलाउँछन् ।
गोविन्दाका व्यवस्थापक शशि सिन्हाका अनुसार गोविन्दा एक कार्यक्रमका लागि कोलकाता जाँदै थिए । उनको बिहान ६ बजेको फ्लाइट रहेको थियो ।
आलमारीमा पेस्तोल राख्दा मिस फायरिङ हुँदा घुँडाभन्दा मुनिको भागमा गोली लागेको हो । उनको खुट्टाबाट गोली निकालिसकिएको छ ।
गोविन्दाको अन्तिम फिल्म सन् २०१९ मा आएको रंगीला राजा हो ।
