-
-
-
-
रामेछाप । नयाँ वर्षको अवसर पारेर रामेछापको ताँवेडाँडामा आन्तरिक पर्यटकसँगै भक्त्तजनहरुको घुइँचो लागेको छ । प्रत्येक वर्ष बैशाख १ गते नयाँ वर्षको दिन ताँवेडाँडा भव्य मेला लाग्ने गर्छ ।
मेलामा रामेछाप, दोलखा, ओखलढुंगा, सोलुखुम्बु, काभ्रेपलाञ्चोक, सिन्धुपाल्चोक, काठमाडौँ, ललितपुर, भक्तपुरलगायत अन्य आसपासका जिल्लाहरूबाटसमेत ठूलो संख्यामा आउने गर्छन् ।
रामेछाप जिल्लाको उमाकुण्ड र गोकुलगंगा गाउँपालिकाको सीमानामा अवस्थित छ ताँवेडाँडा । धार्मिक, पुरातात्त्विक र आकर्षक दृश्यावलोकनको गन्तव्य हो ताँवेडाँडा ।
समुद्री सतहबाट करिब ३ हजार १०० मिटर उचाइमा रहेको ताँवेडाँडाबाट नुम्बुर हिमालसहित गौरीशङ्कर, गणेश, जुगल, गौरी पर्वत तथा रोल्वालिङ हिमशृङ्गला जस्ता हिमालहरु आँखै अगाडि देख्न पाइन्छ ।
ताँवेडाँडा सदरमुकाम मन्थलीबाट करिब ६ घण्टाको कच्ची सडक मार्ग हुँदै गाडीको यात्रामा सहजै पुग्न सकिन्छ ।
