सिटौला जस्ता व्यक्ति आउनुपर्छ भने पनि अहिले वातावरण फेरियो- प्रचण्ड
हाम्रा कुरा
प्रकाशित २०८० फागुन १८ शुक्रबार
1.3k
Shares
चितवन। राष्ट्रिय सभा अध्यक्ष पदमा नेपाली कांग्रेसलाई दिने आश्वासन दिए पनि नेकपा(माओवादी केन्द्र) आफैले सो पद लिने दाबी गरेको छ ।
राष्ट्रिय सभा अध्यक्ष कांग्रेस नेता कृष्णप्रसाद सिटौला हुने चर्चा चलिरहेका बेला एकाएक माओवादीले उम्मेदवारी दिने भएको छ ।
यसैबीच प्रधानमन्त्री पुष्पकमल दाहाल ‘प्रचण्ड’ले कांग्रेसलाई दिने भनिए पनि वातावरण फेरिएको बताएका छन् ।
बिहीबार चितवन पुगेर उनले आफूले राष्ट्रियसभामा कृष्णप्रसाद सिटौला जस्ता व्यक्ति आउनुपर्छ त्यसमा केही फरक हुन्छ भनेको भए पनि अहिले वातावरण परिवर्तन भएको बताए ।
पार्टीको बैठकले राष्ट्रियसभाको अध्यक्ष छोड्नु हुँदैन भनेको उनले बताए ।
उनले भने, “औपचारिक रुपमा लिखित निर्णय भएको छैन ।”
कोशीमा माओवादी केन्द्रको उम्मेदवार हारेपछि यो अवस्था आएको प्रचण्डको भनाइ छ ।
कोशीमा माओवादी केन्द्रको उम्मेदवार पराजित हुने स्थिति कांग्रेसका कारण भएको भन्दै उनले पार्टीका नेता तथा कार्यकर्ताहरू आक्रोशित भएको बताए ।
यता कांग्रेसले भावी राष्ट्रिय सभा अध्यक्षको रूपमा सिटौलालाई कोशीबाट उठाएको थियो ।
प्रचण्डले बुधवार पार्टी केन्द्रीय कार्यालय पेरिसडाँडाँमा बसेको स्थायी कमिटी बैठकबाट राष्ट्रिय सभा अध्यक्षको पदमा दाबी गर्न सदस्यहरूलाई लगाएका थिए ।
सोसँगै माओवादीले पनि आफ्नो उम्मेदवारी रहने निर्णय गरेको छ ।
