काठमाडौँ । आईसीसी क्रिकेट विश्वकप लिग– २ को दोस्रो खेलमा नेपालले नेदरल्याण्ड्ससँग खेलिरहेको छ । कीर्तिपुर मैदानमा नेपालले टस जितेर पहिले बलिङ गरिरहेको छ । 

नेपालले कसिलो बलिङ गर्दै नेदरल्याण्ड्सलाई दबाबमा राख्न सफल भएको छ । नेदरल्याण्ड्सले २५.३ ओभरमा आधा विकेट गुमाइसकेको छ । नेदरल्याण्ड्सले ५ विकेट गुमाएर ९७ रन बनाएको हो । नेपालका लागि ललित राजबंशीले २ तथा सोमपाल कामीले १ विकेट लिए । दुई खेलाडी रन आउट भए । 

नेपाल घरेलु मैदानमा नेदरल्याण्ड्सलाई हराउनै पर्ने दबाबमा छ भने नेदरल्याण्ड्स एसोसिएट राष्ट्रहरुमा बलियो टिम हो । आईसीसी एक दिवसीय वरीयतामा नेदरल्याण्ड्स १४ औँ र नेपाल १५ औँ स्थानमा रहेको छ । 

यसअघि गत बिहीबार आईसीसी लिग २ कै पहिलो खेलमा नेपाल आफूभन्दा एक स्थान पछाडि भएको नामिबियासँग पराजित भएको थियो । 

नेपालले घरेलु मैदानमा त्रिदेशीय एक दिवसीय श्रृंखला खेलिरहेको हो । 

पहिलो खेलमा निराशः
आईसीसी लिग २ मा नेपालले खराब शुरुआत शुरुआत गरेको छ । नेपालले घरेलु मैदानमा भएको पहिलो खेलमै पराजय भोगेको हो । 

कीर्तिपुर मैदानमा नेपाल नामिबियासँग ४ विकेटले पराजित भयो । कमजोर ब्याटिङ गरेको नेपालले ४१.१ ओभरमात्र क्रिजमा टिकेर १३२ रन बनाउन सक्यो । 

नेपालका लागि भिम शार्कीले सर्वाधिक ४४ रन बनाए । गुल्सन झाले २१ रन जोडे । करण केसीले १६ रन जोडे । नामिबियाका गहार्ड इरास्मसले सर्वाधिक ५ विकेट लिए । 

जवाफमा नामिबियाले ३३.१ ओभरमा ६ विकेटको क्षतिमा सहजै जित हासिल गर्यो । नेपालका लागि सोमपाल कामीले ३, ललित राजबंशीले २ तथा रोहित पौडेलले १ विकेट लिए पनि टिमलाई जिताउन सकेनन् । नामिबियाका लागि जान फ्राइलिंकले ३४ रन बनाए । 
 
घरेलु मैदानमा विश्वकप लिग–२ को नयाँ सर्कल बिहीबारदेखि शुरु भएको हो । उक्त लिगमा २४ त्रिदेशीय श्रृंखलाअन्तर्गत पहिलो श्रृंखला नेपालमा भइरहेको हो । 

आगामी सन् २०२७ सम्म चल्ने उक्त लिग–२ मा नेपालसहित आठ टोलीको सहभागिता रहेको छ । 

पहिलो श्रृंखलामा नेपाल, नामिबिया र नेदरल्यान्ड्सबीच प्रतिस्पर्धा भइरहेको हो । अन्य टिममा क्यानडा, ओमान, स्कटल्याण्ड, यूएई र अमेरिका रहेका छन् ।