काठमाडौं । एसीसी प्रिमियर कप क्रिकेट प्रतियोगिताको फाइनल खेल दोस्रो पटक वर्षाका कारण रोकिएको छ । नेपाल र यूएईबीच त्रिभुवन विश्वविद्यालयको कीर्तिपुर मैदानमा भइरहेको खेल दोस्रो पटक वर्षाले रोकिएको हो ।
तर त्रिभुवन विश्वविद्यालयको मैदान कीर्तिपुरमा फाइनल खेल हेर्नका लागि दर्शकहरु भने कतिबेला वर्षा रोकिएला भनेर व्यग्र प्रतिक्षाका साथ बसिरहेका छन् ।
उनीहरु छाता ओढेर खेल हुने आशामा कुरिरहेका छन् । पानी परेपछि पिच त्रिपालले छोपिएको छ ।
खेल बिहान १०ः२५ मिनेटमा पहिलो पटक रोकिएको थियो । त्यसपछि केहीबरेमै शुरु भएको थियो । दोस्रो पटक त्रिवि क्रिकेट मैदानमा पानी परेपछि केहीबेर खेल रोकिएको थियो । पानी पर्न रोकिएपछि खेल पुनः सुरु भएको थियो । ११ः४८ मा फेरि वर्षा भएको थियो । त्यसपछि भने खेल शुरु हुन सकेको छैन ।
वर्षाले रोकिनुपूर्व यूएईले पहिले ब्याटिङ गर्दै २७.३ ओभरमा ९ विकेट गुमाएर १०६ रनमात्र बनाएको थियो । त्यसअघि १६ ओभरमा ५ विकेट गुमाएर ६० रन बनाउँदा पनि वर्षाले खेल रोकिएको थियो ।
आसिफ खानले सर्वाधिक ४६ रन बनाएका छन् ।
यूएई इनिङ्स–
यूएईले पहिलो विकेट १७ रन बनाउँदा गुमायो । कप्तान मुहम्मद वासिम ११ रन बनाएर आउट भए । सोमपाल कामीले विकेट लिए ।
यूएईले २८ रन जोड्दा दोस्रो विकेट गुमायो । वृत्य अरविन्द ८ रन बनाएर आउट भए । करण केसीले विकेट लिए ।
यूएईले ८.१ ओभरमा ३५ रन बनाउँदा तेस्रो विकेट गुमाएको छ । आर्यन लाक्रा १३ रन बनाएर आउट भएका छन् । उनलाई करण केसीले आउट गरे ।
यूएईले ९.१ ओभर खेल्दा ३५ रन जोड्दा चौथो विकेट गुमाएको छ । रमिज शहजाद १ रन बनाएर आउट भए । उनलाई रलित राजवंशीले आउट गरे ।
यूएईले १३.१ ओभरमा ५१ रन जोड्दा पाँचौं विकेट गुमाएको छ । रोहन मुस्तफा २ रन बनाएर आउट भएका छन् । सन्दीप लामिछानेले विकेट लिएका हुन् ।
यूएईले २२.५ ओभरमा ९० रन जोड्दा छैटौं विकेट गुमाएको छ । बसिल हमिद १० रन बनाएर आउट भएका छन् । उनलाई गुल्सन झाले आउट गरे ।
यूएईले २५.४ ओभरमा १०३ रन जोड्दा सातौं विकेट गुमाएको छ । आयान अफ्जल खान ५ रन बनाएर आउट भएका छन् । सन्दीप लामिछानेले विकेट लिएका हुन् ।
यूएईले २७.२ ओभरमा १०६ रन जोड्दा आठौं विकेट गुमाएको छ । आसिफ खान सर्वाधिक ४६ रन बनाएर आउट भए । ललित राजवंशीले विकेट लिएका हुन् ।
यूएईले २७.३ ओभरमा १०६ रन जोड्दा नवौं विकेट गुमायो । जहुर खान डकआउट भएका छन् । ललित राजवंशीले विकेट लिए ।
