काठमाडौं । ग्रामीण जीवनको अनुभव लिन चाहने पर्यटकका लागि तानतिङ (तोनी नासा) गुरुङ गाउँ उपयुक्त गन्तव्य हो । पोखराबाट करिब २७ किलोमिटरको दूरीमा अवस्थित सो गुरुङ गाउँ मौलिक गुरुङ संस्कार र संस्कृतिको अवलोकन र अनुभवका लागि निकै चर्चित रहेको छ ।
आँखा अगाडि देखिने लमजुङ हिमाल र अन्नपूर्ण हिमालले जो कोहीलाई पनि मन्त्रमुग्ध बनाउने गर्दछ त्यसमाथि गुरुङ समुदायको न्यानो आतिथ्य जीवनको एक अविस्मरण क्षणका रुपमा सावित बन्ने गर्दछ ।
झण्डै २५० भन्दा बढी परम्परागत घर रहेको सो गाँउमा आन्तरिक र बाह्य पर्यटकहरुका लागि १४ घरमा सामुदायिक होमस्टे पनि संचालन गरिएको छ । स्थानीय रूपमा उत्पादित अर्गानिक खाना, ढिँडो, लोकल कुखुराको मासु, वनबाट टिपिएको निहुरो जस्ता स्वादिष्ट नेपाली खाना खान पाउनु साँच्चै तानतिङ गाँउमा दुर्लभ अनुभव हुनेछ ।
पोखराबाट सार्वजनिक बस, जीप तथा व्यक्तिगत सवारीका साधनहरुबाट सजिलै पुग्न सकिने तानतिङ गाँउ शहरको भिडभाड र व्यस्त जीवनबाट केही समय विश्राम र रिफ्रेसमेन्टको लागि धेरैको रोजाइमा पर्ने गरेको छ ।
