एमालेले बागमती सरकारलाई दिएको समर्थन फिर्ता लियो, मन्त्रीले राजीनामा दिए, जम्कट्टेल विश्वासको मत लिँदै
हाम्रा कुरा
प्रकाशित २०७९ चैत १० शुक्रबार
686
Shares
बागमती । बागमती प्रदेश सरकारका चार जना मन्त्रीले शुक्रबार राजीनामा दिएका छन् । प्रदेशसभाको शुक्रबारको बैठकमा बोल्दै प्रदेशका आर्थिक मामिला तथा योजनामन्त्री जगन्नाथ थपलियाले आफूसहित नेकपा एमालेका तर्फबाट मन्त्री बनेका चारैजना मन्त्रीले राजीनामा दिएको घोषणा गरे ।
नेकपा एमालेबाट श्रम रोजगार तथा यातायातमन्त्री एकालाल श्रेष्ठ, स्वास्थ्यमन्त्री रामेश्वर श्रेष्ठ र कृषि तथा पशुपन्छी विकासमन्त्री केशवप्रसाद पोखरेल रहेका थिए ।
प्रदेश सभामा बोल्दै नेता थपलियाले निर्वाचनपश्चात पाँच दलीय चुनावी गठबन्धन, सरकार गठन गर्न असफल रही सरकार गठनमा अन्योल सिर्जना भएको तत्कालीन अवस्थामा एमालेले बागमती प्रदेशमा मुख्यमन्त्री शालिकाराम जम्कट्टेलको नेतृत्वमा सरकार बनाउन अभिभावकीय र नेतृत्वदायी भूमिका खेलेको बताए ।
उनले हाल राष्ट्रिय रूपमा विकसित पछिल्ला राजनीतिक घटनाक्रम र माओवादी केन्द्र अर्को फरक राजनीतिक गठबन्धन बनाउने दिशातर्फ उन्मुख भएको अवस्थामा जम्कट्टेल नेतृत्वको सरकारमा सहभागी भइरहन नसकिने अवस्थाका कारण शुक्रबार्रैका मितिदेखि लागू हुनेगरी संयुक्त राजीनामा दिएको घोषणा गरे ।
यसैबीच बागमती प्रदेशका मुख्यमन्त्री शालिकराम जम्कट्टेलले शुक्रबारै विश्वासको मत लिँदैछन् । विश्वासको मत लिनका लागि आह्वान बैठक हाल जारी छ ।
