काठमाडौं । फिलिपिन्सले संयुक्त राज्य अमेरिकाबाट 'हेभी लिफ्ट चिनूक' हेलिकप्टर किन्ने तयारी गरेको छ । यसअघि रुससँग  १२.७ अर्ब पेसो (२२७.३५ मिलियन डलर) बराबरको सम्झौता गरेको भए पनि प्रतिबन्धको डरले फिलिपिन्सले सो सम्झौता खारेज गरेको छ । वाशिंगटनका लागि मनिलाका राजदूतले सोमबार यस्तो जानकारी दिएका हुन् ।

गत जुनमा तत्कालीन राष्ट्रपति रोड्रिगो डुटेर्टेले आफ्नो छ वर्षको कार्यकाल समाप्त गर्नु अघि फिलिपिन्सले युक्रेनमा रूसको आक्रमणसँग सम्बन्धित अमेरिकी प्रतिबन्धहरूको डरले १६ एमआई १७ रूसी सैन्य ढुवानीका हेलिकप्टर किन्नको सम्झौता रद्द गरेको थियो ।

'यो सम्झौता मुख्यतया युक्रेनमा भएको युद्धको कारण रद्द भएको हो। संयुक्त राज्य अमेरिका र पश्चिमी देशहरूबाट प्रतिबन्धहरू आउने अपेक्षा गरिएको छ, स्पष्ट रूपमा यो सम्झौता जारी राख्नु र पछ्याउनु हाम्रो हितमा छैन,' राजदूत जोसे म्यानुअल रोमुआल्डेजले भर्चुअल फोरममा पत्रकारहरूसँग बोल्दै भनेका छन्।

फिलिपिन्सले रूसी हेलिकप्टरमा खर्च गर्ने रकमको लागि संयुक्त राज्य अमेरिका सम्झौता गर्न इच्छुक रहेको रोमुआल्डेजले बताएका छन् । उनले वाशिंगटनसँगको सम्झौतामा मर्मत, सेवा र पार्टपुर्जासमेत समावेश हुने बताएका छन् ।

फिलिपिन्सले रुससँग हेलिकप्टरका लागि दिएको ३८ मिलियन अमेरिकी डलर डाउन पेमेन्ट फिर्ता पाउन छलफल गरिरहेको छ । यसअघि सम्झौताको एक वर्षपछि आउँदो नोभेम्बरमा यी हेलिकप्टरको डेलिभरी हुने तय भएको थियो ।

आफ्नो पुरानो सैन्य हार्डवेयरको पुर्नस्थापना गर्ने पाँच वर्षे ३०० अर्ब पेसो (फिलिपिनी मुद्रा)को योजनाको अन्तिम अवधिमा फिलिपिन्स रहेको छ । दोस्रो विश्वयुद्धका युद्धपोतहरू र भियतनाम युद्धमा संयुक्त राज्यले प्रयोग गरेका हेलिकप्टरहरूलगायतका सैन्य हार्डवेयर यसले नयाँ ल्याएर रिप्लेस गर्दैछ ।

फिलिपिन्सका नयाँ राष्ट्रपति फर्डिनान्ड मार्कोस जूनियरको नेतृत्वमा पनि फिलिपिन्सले संयुक्त राज्य अमेरिकासँग उत्पादन, डिजिटल पूर्वाधार र स्वच्छ ऊर्जा, मोड्युलर आणविक उर्जालगायतका क्षेत्रमा आर्थिक आदानप्रदान गर्ने इच्छा राखेको छ ।