जनप्रतिनिधि र कर्मचारीबीच समन्वय आवश्यक : मुख्यमन्त्री राउत

निरञ्जनकुमार साह,

प्रकाशित २०७८ फागुन २२ आइतबार

जनकपुरधाम । मधेस प्रदेशका मुख्यमन्त्री लालबाबु राउतले विकास र सुशासनका लागि जनप्रतिनिधि र कर्मचारी बीचको समन्वय आवश्यक रहेको बताएका छन् ।

आइतबार महोत्तरीको बर्दिबासमा आयोजित स्थानीय तहहरूका लागि नवप्रवर्तन साझेदारी कोष (आइपीएफ) कार्यान्वयन सम्बन्धी अभिमुखीकरण कार्यक्रमलाई सम्बोधन गर्दै मुख्यमन्त्री राउतले जनप्रतिनिधि र कर्मचारीबीच समन्वय र सहकार्य नभए सम्म विकास र समृद्धि सम्भव नरहेको बताएका हुन् ।

जनताको आवश्यकता र मनोभाव बुझ्ने जनप्रतिनिधि एवं कार्यान्वयन प्रक्रियाका जानकार कर्मचारीहरुबीच तालमेल भए मात्रै प्रदेशले विकास र सुशासनमा फड्को मार्न सक्ने बताए । स्थानीय तहहरूको आर्थिक सबलीकरणका लागी सरकारले ल्याएको नवप्रवर्तन साझेदारी कोषले विकासका र सुशासनका साथै तीनै तहका सरकारबीच समन्वय र सहकार्यको कोशेढुंगा साबित हुने विश्वास वहाँले व्यक्त गरे ।

प्रदेश तथा स्थानीय शासन सहयोग कार्यक्रमका निर्देशक एवं मुख्यमन्त्री तथा मन्त्रिपरिषद्को कार्यालयका सचिव शिवनाथ पौडेलको अध्यक्षतामा भएको उक्त कार्यक्रममा महोत्तरी, धनुषा, सिराहा र सप्तरीका स्थानीय तहका प्रमुख , उपप्रमुख, कार्यकारी अधिकृत, योजना शाखाका प्रमुख सहितको सहभागिता रहेको थियो ।