काठमाडौं । लागुऔषध लिएको आरोप लागेका बलिउड बादशाह शाहरुख खानका पुत्र आर्यनले दशैंमा पनि मुक्ति पाएनन् । क्रुज ड्रग्स पार्टी मुद्दामा पक्राउ परेका आर्यन कम्तीमा २० अक्टुबरसम्म मुम्बईको आर्थर रोड जेलमै रहनु पर्नेछ ।
मुम्बईको स्पेशल एनडीपीएस कोर्टले बिहीबार यो मामलाको सुनुवाईपछि आफ्नो फैसला सुरक्षित राखेको छ । आर्यन कैदी नम्बर एन९५६ बनेका छन् । उनी शुक्रबार क्वारेन्टिन समय सकिएपछि आमद वार्डबाट जनरल वार्डमा सारिएका छन् ।
आर्यनसँग अन्य ५ आरोपी पनि रहेका छन् । सबैले आगामी ६ दिनसम्म २५० भन्दा बढी कैदीसँग कष्टकर जीवन बिताउनु पर्नेछ । यो ठाउँको क्षमता ५० देखि ८० जनाको हो । तर हाल २५० बढी छन् ।
आर्यनलाई पनि विशेष खातिरदारी गरिने छैन । गत ८ अक्टुबरमा जेलमा छिरेपछि आर्यनका पूरै कपडा उतारेर तलाशी लिइएको थियो ।
