काठमाडौं । भारतको चर्चित गायन रियालिटी शो ‘इन्डियन आइडल १२’ को ट्रफी उत्तराखण्डका पवनदीप राजनले जितेका छन् । उपाधिसँगै उनले एक लक्जरी कार र भारु २५ लाख जितेका छन् ।
ग्राण्ड फिनालेमा पवनदीपको टक्कर उनकी निकै नजिककी साथी बनेकी अरुणिता कान्जिलाल र सायली काम्बलेसँग परेको थियो । अरुणिता फस्ट रनर अप र सायली सेकेन्ड रनर अप बनिन् । ग्राण्ड फिनालेमा मोहम्मद दानिश, शनमुख प्रिया र निहाल तारो पनि रहेका थिए । दानिश चौथो, निहाल पाचौं तथा शनमुख छैटौं रहे ।
भारतको स्वतन्त्रता दिवसको अवसर पारेर अगष्ट १५ को राति (आइतबार राति) फिनाले आयोजना भएको थियो । १२ घण्टासम्म उक्त फिनाले भएको थियो । फिनालेमा पहिलो पटक पाँच जनाको स्थानमा छ जना रहेका थिए ।
जितपछि पवनदीपको योजना
जितपछि उनले फिनालेमा पुगेका सबै विजेता रहेको बताए । उनले फिनालेका सबै साथीहरु बनिसकेकाले भविष्यमा मिलेरै अगाडि बढ्ने बताए ।
फिनाले जितेपछि उनले आफ्नो नयाँ योजना पनि सुनाएका छन् । उनले अरुणितासहित शो का सबै प्रतिस्पर्धीसँगै १० दिन केदारनाथको ट्रिपमा जाने बताएका हुन् ।
उनले एक अन्तर्वार्ता दिने क्रममा शो का क्रममै आफूहरुले केदारनाथ जाने प्लान बनाएको बताए ।
केदारनाथ ट्रिपपछि भने पवनदीपले परिवारसँग समय बिताउने बताएका छन् । आराम लिएपछि नै आगामी जीन्दगी बारे सोच्ने पनि उनले बताएका छन् ।
