लण्डन । इङलिश प्रिमियर लिग फुटबलमा आर्सनल शीर्ष स्थानमा पुगेको छ । शनिबार रातिको खेलमा मिडिल्सब्रोसंग घरेलु मैदानमा गोलरहित बराबरी खेलेको आर्सनल ९ खेलबाट २० अंकसहित शीर्ष स्थानमा पुगेको हो ।
त्यस्तै लिभरपुल २० अंकबाटै दोस्रो स्थानमा पुगेको छ । शनिबार राति घरेलु मैदानमा वेष्टब्रोमलाई २–१ ले पराजित गर्दै महत्वपूर्ण तीन अंक बटुलेको लिभरपुल दोस्रो स्थानमा चढेको हो ।
लिभरपुललाई विजयी गराउन साडिओ माने र फिलिप्पे कौटिन्होले १–१ गोल गरे । वेष्ट ब्रोमका ग्यारेथ म्याकउलेले सान्त्वना गोल फर्काए ।
अन्य खेलमा स्टोक सिटीले हल सिटीलाई २–० ले, लेस्टर सिटीले क्रिष्टल प्यालेसलाई ३–१ ले, बर्नलेले एभर्टनलाई २–१ ले हरायो ।
तर स्वान्सीले वाट्फोर्टसंग तथा एएफसी बर्नमाउथले टोटनह्यामसंग गोलरहित बराबरी खेल्यो ।
लिगमा १९ अंकको म्यानचेष्टर सिटी तेस्रो तथा समान अंककै टोटनह्याम चौथो स्थानमा छ ।
आइतबार राति हुने म्यानचेष्टर सिटी र साउथह्याम्पटन तथा अर्को बहुप्रतिक्षित खेलमा चेल्सीले म्यानचेष्टर युनाइटेडसंग खेल्दा भने अंकतालिकामा फेरबदल हुनेछ ।
चेल्सी र म्यानचेष्टर युनाइटेडको खेल विशेष हुनेछ । गत वर्ष जोजे मौरिन्हो चेल्सीबाट निकालिएका थिए भने अहिले म्यानचेष्टर युनाइटेडको म्यानेजर भएर टिम सम्हालेका छन् । खेल चेल्सीकै मैदानमा नेपाली समय अनुसार राति पौने ९ बजे हुनेछ ।
