सांसद सुनील शर्माले भगवान कोइरालाको अस्पताललाई गरे २० लाख सहयोग [भिडियो]
हाम्रा कुरा
प्रकाशित २०८१ वैशाख ६ बिहिबार
243
Shares
काठमाडौँ । प्रतिनिधि सभा सदस्य डा. सुनील शर्माले वरिष्ठ मुटु रोग विशेषज्ञ डा. भगवान कोइरालाको अगुवाइमा बन्न लागेको बाल अस्पताललाई २० लाख रुपैयाँ सहयोग प्रदान गरेका छन् ।
बिहीबार शर्माले काठमाडौंको हेपाली हाइटमा रहेको निर्माणाधीन अस्पताल काठमाडौं इन्स्टिच्युट अफ चाइल्ड हेल्थ (कियोच) मा पुगेर सो रकम सहयोग हस्तान्तरण गरेका हुन् ।
रकम हस्तान्तरण गर्दै सांसद शर्माले राज्य गर्नुपर्ने काम डा. कोइरालाले आफैँ गर्न लागेकाले कोइरालाको सम्मान स्वरूप आफूले सहयोग गरेको बताए।
उनले बच्चाहरूको लागि सातै प्रदेशमा अस्पताल निर्माण गर्न लागेकाले २० लाख रुपैयाँ सहयोग गरेको बताए । उनले विदेशमा बस्ने नेपालीहरूलाई वितृष्णा छाएकाले सकारात्मक सन्देश दिन जरुरी हुने बताए ।
डा. भगवान कोइरालाले लामो डाक्टर जीवनको भोगाइमा पाएको पीडाको निष्कर्षबाट अस्पताल निर्माण गर्न लागेको बताए । उनले २५ वर्षमा नेपालमा बालबालिकाहरूलाई बचाउन सक्ने अवस्था रहेको तर मुलुकको व्यवस्थापकीय क्षमता र प्रविधिको कमीले गर्दा नसकिएको बताए । उनले बालबालिकाहरूको उपचारको लागि प्रमुख प्राथमिकता दिएर सेवा दिने उद्देश्यले अस्पतालको निर्माण थालिएको बताए ।
कियोच अस्पतालले काठमाडौँसँगै सातै प्रदेशमा विशिष्टीकृत बाल अस्पताल निर्माण परियोजना अगाडि बढाएको पनि डा. कोइरालाले जानकारी दिए । उनले गैर नाफामूलक अस्पताल स्थापना गर्ने लक्ष्य लिएको बताए ।
